Gleðilega páska, sumar og allt hvað eina


Nú hefur verið ákveðið að taka nýja stefnu á þessu bloggi. Blogga frekar oftar og minna og láta vita hvar við erum. Skella svo stóru færslunum með inn á milli. Hvernig hljómar það, haaa?

Allavega, hér erum við stödd í Puerto Montt í Chile, hjá frændfólki Snæbjörns þeim Sverri og Ástu. Hér erum við búin að vera í viku í góðu yfirlæti og mikið var nú gott var að komast inn á heimili eftir að hafa verið hálf rótlaus síðustu tvo mánuði.

En nú eru batteríin hlaðin og áfram skal haldið og er Santiago, höfuðborg Chile, næsti stoppustaður. Þangað verðum við komin í fyrramálið eftir um 13 klst rútuferð en við leggjum af stað í kvöld. Þessi rútuferð verður eins og útlendingarnir kalla það „piece of cake“ miðað við þær sólahringsrútuferðir sem við höfum nú þegar kynnst.

Hér flýtur með mynd af Snæbirni, Sverri og Ástu við eldfjallið Osorno sem við fórum í bíltúr upp að. Þar er hið fínasta skíðasvæði á veturna. Osorno er um 2660 metra hátt og er flokkað sem sofandi eldfjall. Því ætti að vera hægt að skíða þarna í einhverja áratugi/aldir í viðbót, vonandi þ.e.a.s.